Sarrera



Altza erabat eraldatutako lurraldea dela jakina da. Egunero ikusten ditugu bere paisaiak, non eremu eraldatuak eta  espazio seminaturalak tartekatzen diren. Askok entzun eta frogatu dugun bezala paisai honen zatitze prozesua nekazaritza, abeltzaintza eta baso-landaketa bultzatzeko guneak sortzerakoan eman zen. Honen ondorioz, bertako basoak desagertu ziren. Gainera, azken 50 urteotan arazoari hirigintza gehitu zaiola ere kontuan hartu behar da.
Nahiz eta aurretik aipatutako txikizioa ia lurralde osoan nabaria izan, oraindik  ez dakigu ba  ote diren gizakiaren eragina hainbeste sumatu ez duten basoak, gehienak gazteak. Leku baztertuetara jo behar da baso hauek aurkitzeko, baina gure zain daude, altzatarron zain,  behin betiko guk babes ditzagun.

Lan honek Altzako udal-barrutia zenari buruzko informazio bilduma egiten du, bertako aniztasun biologikoari buruz dagoen informazio guztia batuz. Modu honetan dago antolaturik:

1. Alde batetik ingurune fisikoari buruzko ezaugarriak agertzen dira. Bertan ezaugarri geologiko, klimatiko eta topografikoei erreferentzia txiki bat egiten zaie. Altzako euskarri fisikoa nolakoa den azaltzen da hemen, honek eusten baitio aniztasun biologikoari.

2. Landaredi potentziala. Atalean gizakiaren eragina gertatu aurretiko Altzako paisaia deskribatzen da.

3. Gaur egungo fauna eta landaretza atalak egun dauden landaredi motak eta fauna espezie ezberdinak biltzen ditu, baita landare inbaditzaileak ere.

4. Interes naturalistikoa duten eremuak. Balore naturalak kontuan harturik Altzako eremu hauek bereizten  ditugu: Mendiola, Ametzagaina, Urumeako ibaiertzak, Molinao, Altzako hainbat landa baso eta Altzabasoa.